en moy, pour ce que à la Vierge, serjant me sui voué. » Lors le deable, en pou d’espace se desapparut. Tiercement, li apparut le deable en forme d’un homme de très grant estature, mais il avoit le col gresle et menu, et estoit emprès lui. Et lors le convers, qui moult se courrouça de ce qu’il li faisoit tant de molestes et de empeschemens, prist i petit glaive qu’il portoit et le commença à ferir forment ; mais son cop fu aussi en vain come s’il eust feru i drapel perdu en l’air. Derechief et quartement apparut le deable audit frere Adam convers, en habit d’un homme noir ne trop grant ne trop petit, aussi comme se ce fust i moine noir, et weulla[1] de son chaperin ses iex qui estoient gros et resplendissans aussi comme ii chauderons de cuivre nouvellement esclarciz ou nouvellement dorez. Adonques ledit convers qui ja estoit moult lassé et troublé de l’ennui que le deable li faisoit, si se pensa qu’il le ferroit[2] en l’un de ses iex. Adonc il esma[3] son cop pour li ferir, mais le chaperon li chei devant ses iex, si perdi son cop.
Derechief li apparut le deable en forme d’une diverse beste, et avoit les oreilles larges comme un asne. Adonc dist le varlet du convers à son maistre : « Sire, j’ay oy dire que qui feroit i grant cercle et mettroit ou milieu et tout environ le signe de la croiz, le deable n’i oseroit aprochier. Ce meschant-ci vous fait trop de moleste, si vous conseille que vous faciez ce que je vous di. » Adonc le convers prit son petit glaive qu’il portoit à son costé, ouquel glaive avoit i fer taillant de
