Page:Viard - Grandes chroniques de France - Tome 8.djvu/236

Cette page a été validée par deux contributeurs.

voiez du roy de France avec moult grant chevalerie des frans hommes et grant multitude de gent à pié, et vint en Flandres, et entre Bruges et Courtrai tendirent paveillons et trez. Car adecertes il ne pooient passer pour l’yaue du fleuve près d’ilec courant ; sur laquelle yaue, les Flamens avoient fraint i pont. Et lors endementres comme les François entendissent à appareillier le pont, ceulz de Bruges, souventes foiz, à bataille ordenée contre couranz, en l’euvre, si comme il pooient, destourbanz, touz les jours les François chascun[1] appelloient. Et lors, vousissent ou non, le pont après ce rappareillié, comme à i mercredi, i jour du moys de juillet, de l’accort de l’une partie et de l’autre, venir à bataille deussent ; ceulz de Bruges, si comme l’en dit, estudianz et cuidans mourir pour la justice, liberalité et franchise du pays, premierement confesserent leur pechiez humblement et devotement, le corps de Nostre Seigneur Jhesu Crist reçurent, portans avec eulz ensement aucunes reliques de sains, et a glaives, a lances et espées et bonnes haches et doudendars, serréement et espessement ordenez vindrent ou champ à pié par i pou touz. Adonques les chevaliers françois, qui trop en leur force se fioient, voiens contre eulz yceulz Flamens du tout en tout venir, si les orent en despit, si comme espoir, foulons, tisserans et hommes ouvrans d’aucuns autres mestiers. Et lors les devant diz François chevaliers, non contredaignanz, leur gent à pié qui devant eulz estoient et aloient, et qui viguereusement les assailloient et qui moult bien se contenoient, firent retraire et es Flamens pompése-

  1. Le ms. fr. 17270 de la Bibl. nat. donne : « à bataille » au lieu de chascun.