departirent de court et vindrent à leur seigneur et li baillierent la lettre de response. Il brisa le seel de la lettre qui moult estoit grande ; et quant elle fu ouverte, il n’i trouva riens escript, fors : « Troup alemant. » Et ceste response fu donnée par le conte Robert d’Artois, avec le grant conseil du roy. Si avint que le roy d’Angleterre, qui guerre avoit au roy de France, envoia par devant ledit Adulphe roy des Romains, en li requerant que par une somme de deniers il se vousist aler avec li contre le roy de France ; lequel Adulphe li ottroia, car il avoit bien en memoire la response des lettres qu’il avoit envoiées au roy de France, comme dessus est devisié. Si envoia deffier le roy de France de par li, Mais quant il cuida assembler grant quantité de gens d’armes pour acomplir ce que promist avoit, pluseurs li faillirent, qu’il ne vouloient pas estre avec le roy d’Angleterre. Si ne pot parfaire ce qu’il avoit empris en son entencion. Mais après une piece de temps se fist la pais entre le roy de France et ledit Adulphe[1], par ceste maniere que ledit Adulphe auroit à femme la seur au roy de France, et par tant fu la pais confermée.
L’an de grâce ensivant mil CC IIIIxx et XV, Raoul
