tant de l’eslection, onques n’avoit esté faite dudit frere Pierre mencion. Si avint que d’aventure, i cardinal, en plein consistoire, commença à raconter de la sainte vie et de la renommée dudit frere Pierre. Et adonques, par divine inspiracion, si comme l’en croit, touz les cardinalz a i seul veu et a une voiz, avec grant effusion de larmes, se consentirent audit frere Pierre, et fu esleu en pape, et avoit bien largement lxx anz d’aage[1] ; mais encore estoit-il sain et haitié et assez fort. Il n’estoit pas grant clerc, mais il estoit de très grant discrecion. Ycestui pape ordena xii cardinalz[2] oultre le nombre qui y estoit, et la decretale que son predecesseur avoit fait sus l’eslection du pape, laquelle estoit demourée en suspense, il la confirma et voult que elle fust tenue et gardée.
Item. Environ l’Advent Nostre Seigneur, ledit pape, en plain consistoire, devant touz, renonça à tout office et benefice de papalité. Après lequel, fu Boniface le viiie né de Champaigne, lequel fu le c iiiixx et xviie pape. Or avint que ledit Celestin, qui pape avoit esté, s’en vouloit retourner au lieu dont il estoit venu. Mais le pape Boniface, son successeur[3], ne le voult pas souffrir, mais le fist honnestement et a très grant diligence, en honneste lieu[4] estre gardé.
- ↑ Latin : « ætatis, ut putabatur, annorum septuaginta et amplius ».
- ↑ Il créa treize cardinaux au mois de septembre 1294. Cf. Ciaconius, Vitæ et res gestæ pontificum romanorum, t. II, col. 284-294.
- ↑ Boniface VIII fut élu pape à Naples le 24 décembre 1294 et sacré à Rome le 2 janvier 1295. Il mourut à Rome le 11 octobre 1303.
- ↑ Célestin V mourut au château de Fumone, dans le royaume de Naples.
