aprochié que le soudan de Babiloine avoit menacié ceulz d’Acre à guerroier, si s’en issi de Babiloine pour aler à Acre et se hasta moult avec grant multitude infenie de gent mescreant. Mais comme il fu jà en mi voie, il fu contraint d’une grant maladie et chai malade au lit de la mort[1]. Et lors, pour ce n’oublia pas sa besoigne qu’il avoit emprise, ainçois envoia vers Acre vii admiraux, des quiex chascun de eulz avoit dessouz li iiiim hommes à cheval et xxm hommes à pié bien armez. Environ mi mars vindrent à Acre, et l’assaillirent et travaillierent de moult divers assaux jusques à l’autre moitié de l’autre mois ensuivant. Mais riens digne de memoire n’i firent ; et lors endementres, comme le soudan regardast et aperçut la mort venir à li prochaine, si appella touz ses amis et touz les admiraux de son ost, et fist souslever son filz, qui ilec estoit present, en son lieu prince, soudan et gouverneur principal de toute sa gent ; et ce fait, assez tost après mourut.
Adonc le nouviau soudan[2], quant il ot son pere mis en terre, dès maintenant, avec i merveilleux et innombrable ost, esmut sa voie envers Acre et aprocha à une liue près de la cité, et ilec fist tendre et fichier ses tentes, et ses instrumens fist apliquier entour la cité et assaillir les crestiens qui dedenz estoient, du quart jour de may[3], par x jours continuelment, envoiant et gettant dedens la cité grosses pierres a per-
