Page:Viard - Grandes chroniques de France - Tome 8.djvu/148

distrent que s’il li plaisoit, on parleroit à ceulz de la cité et aus chevetains savoir mon s’il se vouldroient rendre ne venir à merci. Le roy leur ottroia par le conseil de ses barons. Si s’en alerent en la cité et entrerent enz et conterent leur rayson et qu’il queroient. Quant il orent parlé ensemble, le conte de Fois et Raymont Rogier vindrent au roy et li distrent de par ceulz de la cité, que il leur donnast trives jusques atant qu’il eussent mandé au roy d’Arragon s’il les vouldroit secourre ne deffendre ; et se il ne leur vouloit aidier, ou ne pooit, il rendroient volentiers la cité et se metroient du tout en son commandement. Le roy leur donna volentiers, et envoierent tantost au roy d’Arragon qu’il les venist secourre et aidier, ou il convenoit qu’il rendissent la cité, ne ne la pooient plus tenir contre le roy de France, car il n’avoient de quoy vivre ne de quoy il fussent soustenuz. Les messages trouverent que le roy Pierre estoit mort et pluseurs autres de ses nobles hommes : si en furent touz esbahiz et courrouciez. Arrieres s’en retornerent et conterent à Raymont de Cerdonne et à autres pluseurs des barons comment le roy leur seigneur estoit mort, et de la bataille qu’il avoit faite contre les François, et avoit perdu de tous les meilleurs chevaliers qu’il eust jusques à cent. Quant ceulz de la cité sorent la nouvelle, si manderent au roy que volentiers se rendroient, sauves leurs vies ; mais que ce fust en tel maniere qu’il emportassent leurs biens paisiblement et tout leurs hernois et toutes leurs choses. Le roy qui pas ne savoit la povreté de la vitaille qu’il avoient, si acorda par le conseil au conte de Fois et Raymont Rogier. Tantost comme le pais fu faite et ordenée, les François en-