Et cil de l’ost firent grant feu par les tentes et par les paveillons, si que la froidure ne pot empirier les homes ne les chevaus. Tantost comme le siege fu entour le chastel, l’en courut à l’assaut ; et cil dedenz se deffendirent bien et viguereusement, si que cele jornée, la gent le roy ne porent riens faire. L’endemain le mareschal de l’ost fist assembler ceus qui savoient miner et commanda qu’il minassent par dessous les fondemenz dou chastel et il les deffendroit, li et sa chevalerie. Lors fu crié parmi l’ost que tuit alassent à l’assaut. Si commencierent à lancier à ceus dedenz et à paleter ; et cil dedenz se deffendirent, qui firent les mineeurs reculer et fouir, et dura l’assaut sanz cesser jusques à nonne, et fu le chastel mout defroissié et empirié par dessous. L’endemain, par matin, le mareschal fist drecier ii engins ; li uns gitoit grosses pierres et li autres getoit plus petites. Si lancierent les mestres du grant enging une pierre si grosse enmi le chastel qu’elle confondi tout le palais du chastel, et furent mort presque tuit cil qui dedenz estoient ; et du grant hurt qu’ele donna, elle estonna toute la mestre tour et la fit croller. Quant cil dedenz se virent si entrepris, si ne sorent que faire, car il virent bien que le chastel estoit touz defroissiez et dessus et dessouz et qu’il estoit aussi comme au trebuschier, et avoec ce nul secours ne leur venoit du duc où il avoient grant fiance. Si se rendirent au roy et vindrent à merci.
Quant le roy d’Engleterre oï dire que Belesme estoit pris, si se douta forment et manda le duc et li dist : « Vous me disiez et feisiez entendant que ce jeune roy n’auroit nulle aide de ses homes ; et il m’est avis qu’il a plus grant force de gent que moy et vous n’avons.
