loiaus, et te souviegne de l’Escripture qui dit : Elige viros timentes Deum in quibus sit justicia et qui oderint avariciam. C’est à dire : Aime gent qui doutent Dieu et qui font droite justice et qui heent couvoitise ; et tu profiteras et gouverneras bien ton reamme.
Ne sueffre que vilanie soit dite devant toi de Dieu.
En justice tenir soies roides et loiaus envers ton pueple et envers ta gent sanz torner ça ne là. Se aucuns a entrepris querelle contre toi pour aucune injure ou pour aucun tort qu’il li soit avis que tu li faces ; allègue contre toi tant que la verité soit seue, et commande à tes juges que tu ne soies de rienz soustenuz plus que uns autres.
Se tu tiens riens de l’autrui, rent le i tantost sanz point de demeure. A ce doiz tu metre t’entente comment tes genz et ton pueple puissent vivre en pais et en droiture ; meesmement les bonnes villes et les bonnes citez de ton reamme, et les garde en l’estat et en la franchise où tes devanciers les ont gardez ; quar par la force de tes bonnes citez et de tes bonnes villes douteront li puissant homme à mesprendre envers toi. Il me souvient bien de Paris et des bonnes villes de mon reamme qui me aidierent contre les barons quant je fui nouvellement couronné.
Aime et honneure sainte Eglise ; les benefices de saint Eglise donne à bonnes personnes qui soient de bonne vie et de nete, et si les donne par le conseil de bonnes genz.
Garde toi de mouvoir guerre contre nul homme crestien, s’il ne t’a trop forment meffet, et s’il requiert merci, tu li doiz pardonner et prendre amende si souffisant que Diex t’en sache gré.
Soies, biaus douz fiuz, diligenz d’avoir bons bailliz
