Page:Viard - Grandes chroniques de France - Tome 7.djvu/277

roy Karle s’en ala après ceus qui s’en estoient fouiz de Saint Germain. Quant il sorent que le roy venoit après euls, si alerent à Mainfroi leur seigneur qui s’estoit logiez devant Bounivent^[1] en une plaine. Le conte Gauvain^[2] et le conte Jourdain rassamblerent leur gent, quar il furent mout honteus du meschief qui leur estoit avenu. Si donnerent conseil à Mainfroi qu’il atendist le roy Karle à bataille. Et le roy ala tant avant qu’il fu près de l’ost Mainfroi qui estoit ja tout ordené à bataille es plainz de Bounivent. Si tost comme le roy Karle et sa gent orent monté une montaigne, il virent l’ost Mainfroi tout apertement. Si s’arresterent et pristrent conseil qu’il feroient d’aler seur Mainfroi. Aucuns loerent que l’en atendist à l’endemain pour les chevaus qui estoient travaillié, et avoec ce il estoit près de midi. Les autres distrent tout le contraire, quar se leur anemis qui estoient tuit prest de combatre apercevoient qu’il ne venissent à euls, il cuideroient qu’il eussent paour. Si comme il parloient ensamble, Gile le Brun connestable de France, qui avoit en garde le fiuz au conte de Flandres et toute sa gent, dist au roy : « Quelque li autre facent je me conbatrai et irai tout maintenant seur mes anemis. » Quant le roy oï le conseil Gil le Brun, si penssa i poi et li fu aviz qu’il disoit bien. Si commanda que tuit feussent armé, et fu conseillié que il feissent iii batailles en conroy aussi comme Mainfroi avoit fet. Maintenant sonnerent

1. Bénévent, Italie (Campanie), ch.-l. de prov.
2. Gauvain est Galvan, surnommé Lancea, oncle maternel de Manfred, qui fut décapité le 29 octobre 1268, avec Jourdain, autre parent de Manfred, le même jour que Conradin (Lenain de Tillemont, t. VI, p. 3 et 127).