gent. Mais quant ce Henri vint en champ, il se torna contre lui et pluseurs barons es quiex le conte avoit fiance en leur aide. Quant le conte vit les banieres venir de toutes pars qui se retornerent contre lui ; si fu mout esbahis et corrouciez ; et ne pourquant il ne volt fouir. En ce jour avint que tout le fais de la bataille chai seur le conte Symon, qui par la prouece de ses armes dont il estoit de lonctemps apris se deffendoit ainsi fermement comme une tour ; mès tout ce ne valut neant, quar il ot poi gent, si que ses anemis aprochierent de lui et le navrerent à mort, et chai à terre de son cheval ; et ainsi la prouece et la chevalerie de lui termina par fin honorable.
D’autre part, Henri son fiuz qui se combatoit aussi comme hors du sens pour la mort de son pere, maintenoit trop viguereusement l’estour, fu abatuz et pris. Et après ce que il fu pris, fu il ocis entre les mainz d’aucuns chevaliers qui le vouloient sauver. Quant Odouart sot que Henri fu ocis, si dist que ce estoit grant mauvaistié de ocirre chevalier puis qu’il estoit pris.
Gui le plus jeune des freres chai entre les mors touz pasmez aussi comme demi mort ; lequel fu recueilli et mis hors de la presse. Aucun de la partie Odouart furent plain de si grant felonnie et orent en si grant haine le conte Symon, qu’il ne leur souffist pas de ce qu’il l’avoient ocis de pluseurs plaies, quar il furent pis, quar il li esrachierent les genitaires du cors, et puis le despecierent par pieces et lessierent le cors tout descouvert pour devourer aus oisiaus du ciel. Si tost comme il se furent d’iluec parti, les moines d’une ab-
