Page:Viard - Grandes chroniques de France - Tome 7.djvu/266

Le texte de cette page a été corrigé et est conforme au fac-similé.

samble de la pès ; et requist le roy au conte Symon qu’il delivrast le roy Henri et son fiuz de sa prison, et que il les acorderoit ensamble si que le conte i auroit honneur et proufit. Le conte respondi que ja ne s’acorderoit se la constitucion que le roy avoit jurée n’estoit gardée à tenir fermement. Quant le roy de France vit qu’il ne porroit oster le conte de son propos, si li donna congié de retorner. Si tost comme il fu retornez, il prist en sa main, par la volenté du commun pueple les chastiaus et les fortereces du païs ; et firent aliances ensamble, lui et le conte de Glocestre, qu’il garderoient les choses communes au profit du roi et de son reamme. Si comme le conte Symon et cil de Glocestre durent donner seurté li uns à l’autre, il se descorderent et s’entredistrent paroles despiteuses, et departirent par mal talent. Quant il furent departis, le conte Rogier penssa en son cuer comment il porroit domagier le conte Simon. Si envoia par malice le meilleur destrier et le plus isnel qu’il peust trouver à Odoart, au chastel où il estoit, en autrui non que ou sien ; sur lequel destrier Odouart monta et s’enfoui de la prison au conte Simon[1], et s’en vint au conte de Glocestre et firent aliances ensamble d’aler contre le conte Symon qui garde ne s’en donnoit, ainz avoit baillié grant partie de sa gent à Symon son filz pour ce qu’il alast par le païs pour assambler vitaille. Si comme Symon retornoit à son pere, une espie le vint dire au conte de Glocestre. Si li vint au devant entre lui et Odouart atout grant gent ; si li tolirent sa proie et le cuidierent prendre, mais il s’enfoui jusques à i chastel à garant.

  1. Édouard s’échappa le 28 mai 1265 (Ch. Bémont, op. cit., p. 239).