Page:Viard - Grandes chroniques de France - Tome 7.djvu/221

comme il soient en nostre service, ne marient leur enfanz à nul autre qui soient demourant en leur baillie sanz nostre especial commandement. Et volons qu’il ne metent fiuz ne fille en nulle religion qui soit en leur baillie, ne ne facent donner benefice en sainte Eglise ; ne ne volons pas qu’il prengnent procurations ne gistes es mesons de religion. Noz volons que noz bailliz et noz prevoz n’aient tant sergenz que le pueple en soit grevez, et volons qu’il soient nonmez en plaine assize quant il seront fais sergenz de nouvel. Si volons que noz sergenz qui sont envoiez pour fere aucuns commandemenz, qu’il ne soient de rienz creuz sanz letres de leur souverain. Nous volons que prevoz ne bailliz facent grief au pueple qui demeure en leur justice outre droiture, ne que nus hom soit tenuz en prison pour chose que il doie se il abandonne ses biens, fors pour nostre debte tant seulement. Nous establissons que se le debteur confesse la debte que il doit, que amende nulle n’en soit levée ; et se aucuns doivent amende pour leur meffez, nous volons que elle soit jugiée en plains plés. Et se aucuns prevoz ou abilliz menacent les genz pour avoir amende en repostaille, nous le punirons et des biens et du cors. Après ce, nous establissons que cil qui tendront noz baillies et noz prevostez soient si osez qu’il les vendent ne metent hors de leur main sanz nostre congié. Et s’il sont ii ou iii ou pluseurs qui achatent ensamble aucuns de noz officez, noz volons que li uns d’eus face l’office et le service qui apartient à ce fere. Si volons que nul de noz sergenz requiere debte que l’en li doie, par soi ne par son commandement, mès par autre, se ce n’est des debtes qui apartienent à son office. Nous deffendons à noz bailliz qu’il ne travaillent noz sougez en causes entamées par de-