Eschartai en tel maniere que les messages qui iroient au prince Eschartai retorneroient tantost comme il auroient parlé à lui, et les autres iroient au grant roy Cham. Le roy entendi par les messages que le roy auroit mout chier une tente en laquelle il eust une chapelle. Si en fist faire une mout belle d’escarlate vermeille, à pommiaus dorez, toute brodée de riches oevres ; et fist portraire dedenz comment les iii roys de Tharse aourerent Nostre Seigneur, et comment il reçut mort pour nostre rachatement[1]. Et tout ce fist-il faire por miex esmouvoir le roy Cham à la foy crestienne. Et si li envoia avoec tout ce du fust de la sainte croiz ; et en envoia une partie au prince Eschartai, et l’amonnesta mout par ses letres qu’il vossist secorre et aidier à la foy crestienne. Les messages[2] qui furent establiz pour aler au roy de Tharse et au prince Eschartai furent ii freres meneurs et ii preecheurs et ii clers et ii lais. Et fu la chose commandée à frere Andrieu de Lonc Jumel, comme mestre et chevetaine d’eus touz.
- ↑ Cf. Joinville, §§ 134 et 471.
- ↑ Eudes de Châteauroux nous donne les noms de ces envoyés et la date de leur départ : « Octavo vero kaL Februrarii (25 janvier) dicti nuncii a rege Franciæ licentiam receperunt ; et vi kal. dicti mensis (27 janvier) Nichossiam exierunt, et cum eis fratres Prædicatorum Andreas, Johannes et Willelmus, quos rex mittit ad dictum regem Tartarorum » (d’Achery, Spicilège, t. VII, p. 222. Cf. G. de Nangis).
