perdu à celle foiz en mer ; mais ainsi mandoit-il pour ce qu’il n’eust nulle fiance el roi de France ne en sa gent, car il penssoit bien que le soudan de Moisac desirroit mout à estre crestien. Et si tost comme le soudan de Moisac sot que le roy de France venoit seur Sarrazins, il le fist savoir au roi de Cham nostre mestre ; et pour ceste reison nous a envoié le prince Eschartai à vous, pour ce que vous sachiez le propos des Tartarins qui est tel qu’il voelent assegier la cité de Baudas et le califfe des Sarrazins en l’esté prochain à venir, et vous mande le prince Eschartai que vous assailliez Égypte, si que le Califfe ne puisse avoir secours de ceus d’Egipte. »
Après ce qu’il orent dit et forni leur message, le roy lor demanda de leur maniere, et il distrent que le pueple des Tartarins estoit issus hors de sa terre, bien avoit xl anz passez, et estoient si grant multitude qu’il n’est cité ne chastiau qui les peust soustenir, ne où il peussent demourer, ainz sont en boscages et en pastures où il entendent à norrir leur bestes. La terre dont il vindrent premierement est loing de la terre où le grant roy demeure par l’espace de xx jornées[1], et a non celle terre Tartar, « pour laquelle noz sommes apelé Tartarins ». Et distrent les messagiers que le roy Cham avoit avoec lui touz les haus princes de sa terre, et si grant multitude de gent à pié et à cheval, et si grant habondance de bestes que nul ne les porroit nombrer. En paveillons et en tentes demeurent touz jorz, quar nulle cité ne les porroit recevoir ; et
- ↑ Eudes de Châteauroux et G. de Nangis : « Distat per quadraginta dietas a terra quam modo inhabitat ille magnus rex Cham. »
