drieu et les envoia en France à la royne Blanche, sa mere. Les messages distrent que le grant roy de Tharsse avoit pris baptesme et estoit crestien, et pluseurs autres des barons de Tharse ; et avoit bien iii anz et plus que il tenoit la foy crestienne ; et disoient que pluseurs anz avoit ja passez que le prince Eschartai leur mestre estoit crestien ; et l’avoit envoié le grant roi de Tharse a grant foison de gent contre Sarrazins pour essaucier la foy crestienne, et que l’entencion et le propos estoit du prince Eschartai, de fere le profit à touz ceus qui vodroient aourer la croiz et de conbatre soi à touz ceus qui seroient contre la foi crestienne anemis. Et desirroit mout l’amour et la faveur à avoir du roy de France, et avoit oï dire qu’il estoit en Chipre ; et encor disoit plus li messages, por certaine chose, qu’il vouloit asseoir la cité de Baudas[1], pour ce que li Apostoiles des Sarrazins i sejornoit ; et devoit mouvoir dedenz la feste de Pasques. Icelui Apostoiles estoit apelez Califfes, et estoit coustumiers de sejorner à Baudas, et fesoit souvent secors et aide au soudan de Babiloine, et fu par lui secourue Damiete[2] quant elle fu assise du roy Jehan de Jherusalem. Quant le roy oï ces nouveles, si en fu mout lié et reçut les messages cortoisement et leur fist amenistrer boivres et mengiers et quanque mestier leur fu. Le jour de Nouel furent à la messe avoec le roy et furent à sa court au disner et se contindrent bien et honnestement. La te-
Page:Viard - Grandes chroniques de France - Tome 7.djvu/158
Le texte de cette page a été corrigé et est conforme au fac-similé.
