Le roy de France vit que son ost estoit grant et bel, et que genz li venoient chascun jour de toutes pars en aide. Si s’en ala à i chastel que l’en apelle Fontenai[2], enclos de ii paire de murs, et si estoit avironné de hautes tours grosses et deffensables et bien garnies. Il fist avironner le chastel et assaillir de toutes pars ; mais cil dedenz se deffendirent forment et furent de si grant prouece que les François ne leur porent mal fere ne de riens empirier. Quant le roy vit la force du chastel et la prouece des genz, si fist drecier une tour de fust contremont, si haute que cil qui furent dedenz virent toute la contenance des genz du chastel et commencierent à lancier et à geter dendez et traire à euls, si qu’il en ocistrent assez. Quant cil du chastel virent que cil de la tour les grevoient si forment, si se resvertuerent et geterent feu gregois, si que il embraserent et enflamberent toute la tour. Cil qui dedenz estoient s’enfouirent pour le peril où il estoient, et commencièrent François à reculer. En ce hustin et en cel assaut, avint que i aubalestier à tour trait i quarrel et feri le conte de Poitiers el pié et le navra forment.
- ↑ Guillaume de Nangis, Vie de saint Louis, dans Rec. des Hist. des Gaules et de la France, t. XX, p. 336-339 ; Vincent de Beauvais, op. cit., liv. XXX, chap. cxlviii.
- ↑ Frontenay-l’Abattu, auj. Frontenay-Rohan-Rohan, Deux-Sèvres, arr. de Niort, ch.-l. de cant. Sur la prise de cette ville, voir Mathieu de Paris, op. cit., t. IV, p. 202 et 206 ; cf. Lenain de Tillemont, op. cit., t. II, p. 442, et Ch. Bémont, op. cit., p. 298.
