Quant les barons orent oï et entendu la requeste le roy, si distrent qu’il estoient tuit prest de lui aidier et que ja ne lui faudroient tant comme il porroient durer. Le roy Henri fist faire ses garnisons pour passer mer et manda sodoiers en Alemaigne et en Danemarche et en Norvée, et menda à touz les haus barons qui li apartenoient qu’il venissent en s’aide, et fist faire granz garnisons de vins et de viandes et d’armes et de chevaus pour passer outre, et entra en mer a grant compaignie de chevaliers et ot bon vent qui le porta assez tost outre[1]. Quant il fut au port arrivé, la contesse sa mere ala encontre et le baisa mout doucement et li dist : « Biaus filz, vous estes de bonne nature, qui venez secorre vostre mere et voz freres que les filz Blanche d’Espaigne veulent trop malement defouler et tenir souz piez. Mais se Dieu plaist, il n’ira pas si comme il penssent. »
Ainsi demourerent une piece du temps ensemble. Le roy de France assambla grant gent de partout son reanme et tint grant parlement à Paris. A ce parlement furent les pers de France ; si leur demanda le roy que l’en devoit faire de vassal qui voloit tenir terre sanz seigneur et qui aloit contre la foi et contre l’ommage que il avoit tenue, il et ses devanciers ; et il respon-
- ↑ Henri III, parti de Londres le 21 avril 1242, se serait embarqué le 15 mai à Portsmouth, aurait débarqué le samedi 17 mai à l’abbaye de Saint-Mahé ou Saint-Mathieu (Finistère, arr. de Brest, cant. de Saint-Renan, comm. de Plougonvelin), d’où il serait reparti le lundi 19 pour aborder le mardi 20 mai à Royan (Charente-Inférieure, arr. de Marennes, ch.-l. de cant.) (Mathieu de Paris, Chronica majora, t. IV, p. 192. Cf. Lenain de Tillemont, op. cit., t. II, p. 437-438, et Ch. Bémont, La campagne de Poitou, p. 295, note 4).
