estat, car si enemi estoient de totes parz. Il avoit ses genz perdues ; nus qui ovoc li fut ne savoit quel part torner. Nequedant Nostre Sires envoia son consel au prodome, car il n’orent gueres avalé de la montegne, quant il virent auques près les feus que ses genz faisoient en la place où l’avangarde estoit logiée. Bien cognurent que ce estoient li lour, si se traidrent vers aus.
Mais autres croniques[1] dient ci endroit que li rois demora toz sous sor la montaigne. Si avoit asez de ses enemis entor li qui forment l’asaloient ; si ne savoient mie que ce fut li rois et il se defendoit tot à pié moult fierement. Si estoit ja ausi comme noire nuiz. Lors se trait soz un arbre qui sor la montaigne estoit et monta desus et se defendi ensi de l’epée moult longuement et moult et moult firement. Totevoies li Tur se douterent que secors ne venit de l’avangarde, et por la nuit mehemement si se departirent.
Quant li chevalier de l’avangarde virent lor segnor venir et il sorent certenement la mesaventure si doulerouse qui li estoit avenue, si commencierent à faire trop grant duel. Ne pooient recevoir nul confort, car il n’i avoit gueres celui qui n’aust perdu aucun de ses amis. Il estoient en grant aventure, car il n’antendoient se à plorer non et à faire duel ; car se li Tur le sausent, legierement les peusent toz occirre ou prendre. L’an ne les pooit retenir que il n’alassent huchant[2] li
- ↑ Cette autre chronique est celle d’Eudes de Deuil, moine, puis abbé de Saint-Denis, qui comme secrétaire et chapelain de Louis VII l’accompagna dans la croisade et fit le récit de cette expédition : De Ludovici VII… profectione in Orientem. Cf. Migne, Patrologie latine, t. CLXXXV, 2e partie, col. 1238, liv. VI.
- ↑ Huchant, appelant.
