faire. Bien disoient que Tur estoient mauvaise gent en bataile ; n’avoit gueres que il le proverent bien quant il les deconfirent legirement en plaine terre[1]. Lors se defendirent moult viguerousement, et ovoc aus se ralierent moult des autre, si comme il pooient percier. Li Tur reparloient en lor language et s’entraforçoient de bien faire et ramentevoient sovent que il n’avoit gueres que il avoient vaincu en batale l’emperaor qui graindre sires estoit et plus avoit gent que li rois de France.
En cete maniere dura longuement la batale fiere et aspre. Li prodome se tindrent et defendirent tant com il porent ; asez occidrent et navrerent de lor enemis. Mais li Tur estoient si grant planté de gent que quant li blecié et li las se traioient arrieres, tantôt revenoient li frés en lor places. Li nostre n’avoient de quoi il peusent faire tel change, si ne porent plus endurer, ainz furent deconfit. Trop en i ot de morz, mais plus encore enmenerent-il de pris en lians. En cele place, furent ou mort ou pris, l’on ne sot pas bien lequel, IIII trop bon chevalier et bien haut homme, dont li pooirs de France fu moult afebloiez : li cuens de Garenne, Gauchiers de Monjay, Evrarz de Bretuel[2], Ithiers de Maignac. Des autres i ot asez qui por le servise Jhesu Crit morurent en ce jor, honorablement au siegle et glorieusement à Dieu. Nului ne doivent deplaire les choses que Nostre Sires fait, car totes ses ovres sont bones et droites. Mais, selonc le jugement des homes,
