Page:Viard - Grandes chroniques de France - Tome 6.djvu/63

toit la baniere le roi. Devisié estoit et acordé que il se demoreroient ce soir et tendroient lor pavelons ou somet dou tertre. Quant cil Gefroiz fu montez en haut, o tote la gent que il menoit, avis li fu que la jornée estoit petite et que il i avoit encore asez dou jor à venir. Cil qui le conduisoient par le païs li firent entendant que un petit outre avoit moult bele place et melor lieu por remanoir l’ost que sor le tertre. Cil les crut et se commença à hater por aler là où il disoient. L’arieregarde cuida que si com il avoit esté devisié, l’on se deut logier en haut et que ce estoit près ; si ne se hasterent mie, ainz commencierent à aler belement. Li Tur qui toz jors estoient près et costoioient nostre gent por savoir se il lor poissent maufaire, virent que ces deus grosses batales estoient loing à loing par la voie, et entre II et sor la montegne n’avoit se gent desarmée non. Tantôt conurent lor aventage ; en ce se fierent moult que les voies estoient roistes et estroites, si que trop estoit grief chose de noz genz metre ensemble. Por ce, ferirent des esperons li Tur isnelement et sorprident le somet dou tertre, si que li derrenier de l’ost ne poisent venir aus prumiers, se parmi aus non. Lors commencierent à corre sus à nostre gent et à trère moult espessement des ars turquois, puis venoient juques à aus, aus maces et aus espées. Moult troverent les noz à grant mechief por ce que li oz estoit ensi partiz et devisiez. Tant avoir de somiers en ces voies estroites et autres destorbiers que li prodome et li bon chevalier qui defendre se voloient et venir aus Turs ne pooient passer vers aus. Asez i ot lors en cele venue mort de la nostre gent ; mais au darrenier se commencierent à trère ensemble li plus prou et li plus hardi des François et s’entramonetoient de bien