deconfiz et perdue sa gent ; si s’enfuioit tapisant par bois et par montegnes, a petite compagnie. Premierement, por ce que l’on ne savoit mie qui tex noveles avoit aportées, douta l’on se ce estoit voirs ou non. Mais ne demora gueres après ce, que il sorent bien la verité, car li dux de Soueve, Ferris, uns jones hom de trop grant afaire, niés estoit l’emperaor[1], de son ainné frere, et puis fu après son oncle empereres sages et viguerous. Icit vint en l’ost le roi de France, car l’empereres, après cele grant mesaventure l’enveoit parler au roi por prendre un parlement entre aus dous, si que il se conseilassent que il porroient faire. Voirs est que li consauz aut mieuz valu avant. Mais encores avoit li empereres son cors à garantir et li remanant de ses homes. Por ce, voloit avoir dou roi de France, qui ses amis estoit, aide et conseil[2]. Icit Ferris, quant il vint, conta bien la honte et le domache que li Tur lor avoient fait. Quant li rois et li baron de France l’oïrent, grant duel en orent et grant pitié. Li rois, por conforter l’emperaor, prit ovoc lui de ses plus sages barons, et chevaliers et serganz mena asez et s’en issi, ne demora mie de son ost, puis vint là où li empereres estoit logiez, si com li dux Ferris le mena, car ce n’etoit pas loing.
Quant cil dui haut home s’entrevirent, de bon cuer s’antresaluerent et baisa li uns l’autres. Li rois le recon-
- ↑ « Filz de son ainné frere » (royal ms. 16 G VI, fol. 314 vo). Ce fut plus tard Frédéric Ier Barberousse, empereur du 5 mars 1152 au 10 juin 1190.
- ↑ « Pour savoir comment il se defendroient contre les Turs et comment il pourroient avoir aide et confort de la male fortune et dommaigne qui lui estoient advenuz » (royal ms. 16 G VI, fol. 314 vo, en note).
