et à chevaus. Li autre voloient que on alast avant, car il avoient esperance que plus tost peusent trover viandes en passer avant que en retorner. Tandis com il estoient en ce contenz et en la doute, si que il ne savoient que faire, aucunes genz de lor ost qui s’estoient elognié en costé d’aus et puis revenu arrieres, lor firent asavoir que asez près d’iluec s’estoient asemblé trop grant planté de Turs qui estoient tuit armé. Bien est voirs que li Grezois qui fui s’en estoient, les menerent à escient au pis que il porent, car il les embatirent en uns granz deserz, où il n’ot ainques ne aré[1] ne semé, et il les deusent avoir menez par Licaone que il avoient laissié à destre. Lors trovasent la voie plus petite et terres guehennables, plantaives de bones viandes ; mais il les avoient mis es deserz de Capadoce por aus elognier dou Coine. L’an disoit communement, et ge croi que il fut voirs, que cil Grezois avoient ce fait par la volenté et par le commandement l’emperaor Manuel, qui pas ne vousit que ces genz de l’empire d’Alemagne venisent à bon chief de lor emprises ; car li Grezois ont toz jors envie sor aus, ne ne voudroient pas que lor pooirs creut ne amendat, car trop ont grant dedain de ce que li empereres se claime emperaor des Romains ausi com li lour empereres, por ce que il dient que li empereres de Costantinoble doit avoir toz sous[2] la segnorie sor tot le monde.
