lasseté, li traitor Grezois se partirent de l’ot tot coiement et s’anfuirent. L’andemain, quand il fu ajorné[1], il voudrent movoir por aler si com il souloient ; mais cil qui les devoient conduire ne se midrent mie devant. Li chevetaine s’en mervelerent et les firent querre, mais ne les pot l’on trover. Lors s’aperçurent de lor traïsom et vindrent à l’empereor ; la chose li conterent si com ele estoit. Cil qui par malice avoient ensi guerpi l’ost ne se tindrent pas apaié dou mal que il avoient fait, ençois en voudrent plus faire, car il vindrent tot droit en l’ost le roi de France qui chevauchoit après, ne gueres loin d’iluec, et didrent au roi que il avoient l’empereor et son ost bien et sauvement conduit juques à la cité dou Coine qu’il avoit prise par force et vaincuz toz les Turs qui contre li se midrent, et trop granz richeces i avoit gaegnies. Ce li firent entendant espoir par cele entenciom que il voloient mener le roi cele maime voie où li empereres s’estoit embatuz perilousement, ou por ce, se li François sausent le mechiés de l’emperaor et de sa gent, il li coreusent aidier hativement, et ce ne vousisent pas li traitor. Bien repuet estre que il li mentirent por ce que se li rois saut la verité et la daloiauté que il avoient faite, il les pendit tantost parmi les goules.
Quant li empereres vit que il estoit ensi deceuz, et que il n’avoit en tot son ost home qui li saut ensegnier la droite voie, il manda ses barons et lor demanda conseil que il feroit. Il ne s’acorderent pas tuit à une chose, car l’une partie looit que il s’en retornasent tote la voie, si com il estoient venu, juques il peusent trover viandes qui dou tot lor estoient falies à homes
- ↑ Quant il fu ajorné, quand il commença à faire jour.
