et en tel perseverance, et sacrifier à Dieu, en vraie pacience, les tribulations de cest siecle. Si devoit bien avoir tele fin, car il avoit touz jors menée vie aornée de vertuz. Mais une chose i avoit qui un petit troubloit leur joie, car il se doutoient que il ne vosist son cuer apaisier vers Loys son fil, qui tant de tribulations li avoit faites, car il savoient bien que il l’avoit tantesfoiz corrocié, et maesmement en la fin de sa vie, que il en avoit grant ire et grant doleur au cuer. Toutes voies, se fierent tant de la pacience de son douz cuer qui ainques, pour nule adversité n’avoit esté brisié, que il essaierent legierement sa pensée par l’evesque Drove son frere que il ne voloit refuser de nule chose que il vosist. Et quant li evesques Droves out son fil amenteü[1], il monstra premierement par semblant l’amertume et la doleur que il avoit au cuer. Mais après, quant il fu revenuz petit à petit à sa pensée, et il se fu efforciez de parler tant com il pout, il commença à raconter et numbrer les angoisses et les maus que il avoit faiz et puis les merites que il avoit deservies en fesant tiex choses contre nature et contre le commandement Nostre Segneur. « Mais pour ce, dist-il, que il ne puet à moi venir pour faire satiffation au tesmoing de Dieu et de vous, qui ci estes present, je li pardoing tout quanque il m’a meffait. Mais à vous, dist-il, apartient de lui amonester que se je li pardoing ce que il a tantes foiz vers moi mespris, toutes voies, n’oblit-il pas les travauz et les gries que il m’a faiz, meesmement en la fin de ma vie, qui m’ont mené à la mort, et si n’oblit pas ausi ce que il a petit prisié et mis en
- ↑ Amenteü, mentionné.
