en faire toutes[1] et rapines. Et pour ce, prioit li evesques Ebroïns à l’empereor, pour Dieu, que il meist hastif conseil en ceste besoigne et venist tost ou païs et ordenast du roiaume à sa volenté, avant que ceste pestilence fust plus multipliée. Li empereres regracia moult l’evesque Ebroïn pour sa bone volenté et pour sa loiauté, et touz les autres ausi qui à son acort se tenoient. Arrieres l’en envoia et manda sa volenté par li maismes à ceus de cui il se fioit ou païs et manda à aucuns que il fussent à lui à Chalon en Borgoigne ou moys de septembre, car il proposoit à faire le parlement.
Si ne doit-on pas cuider que li empereres eust corage de l’enfant Pepin, son neveu[2], deseriter[3], mais il voloit metre conseil en sa besoigne et chastoier et restraindre la legiereté de la gent du païs, car il cognoissoit leur manieres et leur desloiauté, comme cil qui ou païs avoit esté norriz et savoit que ce estoient genz où il n’avoit point d’esperance de seurté. Et pour ce que il peussent corrumpre et convertir à leur meuveses mors Pepin son fil, le pere de l’enfant chacierent-il au commencement hors du roiaume, ceus que il meismes avoit là envoiez pour lui garder et ensegnier, ausi com il avoient esté baillié à lui meismes au tens Karlemaine son pere. Et quant il les orent hors boutez, si s’abandonerent à faire leur granz desloiau-
