com ele deust, car leur anemi leur corurent sus une heure que il ne s’en prenoient garde, et cil qui furent desarmé et esbahi de leur seurvenue soudaine tornerent en fuie. Là fu occis li cuens Odes et Guillaumes, uns siens freres, et maint autre de leur gent[1], et cil qui eschaper pourent par fuir furent sauvé.
Cil qui orent eue ensi victoire demorerent ausi com en desesperance, car il virent bien que il ne povoient pas illuec demorer seurement, et Lothaires leur estoit si loing que il ne povoient avoir de li secors ; si se doutoient encores plus que li empereres ne venist seur iaus ou que il n’i envoiast, ou que il ne fussent encontre de li ou de sa gent, se il se metoient en voie pour aler à Lothaire. Pour ce, se hasterent d’envoier à lui et li manderent la besoigne et le peril où il estoient, et que il ne lessast pas que il ne les secorust. Et quant Lothaires oï ce que il avoient fait et le peril où il estoient, il proposa que il les secorroit.
Li cuens Guerins et cil qui ovec lui estoient garnirent en ce point la foreterece de Chalon[2], pour ce que ele leur fust refuge et defense contre leur anemis, se mestier leur fust. Lothaires, qui ce sot, cuida là venir soudainement ; mais il ne pout à cele foiz et toutevoies i vint-il à la parfin, le chastel de la cité assist et ardi tout quanque il trova dehors la forterece. Grant assaut donerent cil dehors, et cil dedenz grant defense ; v jors dura li assauz moult forz et moult aigres
