[1]Après ces choses que vous avez oïes, repaira li empereres pour yverner à Es la Chapelle ; son fil Lothaire tint adés ovec lui, puis envoia querre la roine Judith que li traiteur avoient envoié en essil en Aquitaine, ou mostier Sainte Ragonde, et ses ii freres, Conrat et Rodulphe, que il avoient faiz tondre en abeïes. Mais ainc ne vout à li habiter, ne porter honeur d’espouse, jusques atant que ele se fu purgié selonc les lois du blasme que li traiteur li avoient mis sus[2]. De ce se purja loiaument, si comme ele dut. A la feste de la Purification, qui après vint, dona li empereres la vie à touz ceus qui estoient jugié à mort. Ses iii fiuz qui ovec lui estoient renvoia en leur contrées ; Lothaire en Ythalie, Pepin en Aquitaine et Looys en Baiviere, et il demora à Es toute la saison, jusques après la Resurrection. D’Aes se parti et s’en ala à Ingelinhan. Là n’oblia pas sa debonaireté et sa misericorde, qui ovec lui estoit criée et née, ausi comme dit Job, et que il avoit aportée du ventre sa mere ; car touz ceus que il avoit envoiez en essil en divers lieus par leur meffaiz rapela et leur rendi leur heritages et leur possessions. Et touz ceus que il ot fait tondre en abbeïes, fist-il aussi rapeler, ceus qui revenir s’en voloient. Après, s’en ala
- ↑ Vita Hludowici imperatoris, chap. xlvi.
- ↑ Les Annales de Saint-Bertin (année 831) disent : « Purificavit se secundum judicium Francorum de omnibus quibus accusata fuerat », et Thegan (chap. xxxvii) fait connaître aussi que le pape et les évêque intervinrent, « quam honorifice suspecti, jubente Gregorio romano pontifice cum aliorum episcoporum justo judicio ». Cf. Annales Mettenses, année 830.
