se complainstrent de ce que li empereres, ce disoient, les avoit estrangiez et esloingniez de liu, dont il estoient chauz en despit, et il et tuit li autre. Et Berarz estoit touz sires dou palais qui ja estoit montez en trop grant orguel. Et plus grant desloiauté li fesoient-il entendant, car il disoient que il honissoit l’empereor de sa fame[1], et que il estoit si atornez par sorceries que il ne s’en povoit venchier ne soi meismes avertir de ceste chose. Si estoit trop granz hontes à l’empereor premierement, et puis à lui et à toz ses freres. Si apartenoit, ce disoient, à bon fil et à loial de porter grief la honte de son pere et de lui remetre et restablir en dignité et en bone memoire. Et li bons fiuz qui ce feroit au pere, ne deserviroit pas tant seulement renomée et loenge de vertu, mais acroissement d’oneur terrienne. Par tels paroles et par autres semblables deçurent le jone home et l’armerent si contre son pere que il les crut des granz desloiautez que il li fesoient entendre. Ovec aus, mut a granz genz et vint jusques à Orliens. Odon, qui de par l’empereor i estoit, osterent, et i mistrent un autre qui avoit non Manfroiz ; puis se mistrent en voie et vindrent jusques à Verberie[2]. Li empereres qui certainement savoit que il avoient faite conspiration contre li et contre Judith sa fame, et contre Berart, apela Berart et li dist que il s’enfuisist[3], que li traiteur ne le trovassent entor lui. A Judith l’empereriz commanda que ele demorast à Loon et que ele se tenist
Page:Viard - Grandes chroniques de France - Tome 4.djvu/128
Le texte de cette page a été corrigé et est conforme au fac-similé.
