emprist penitance de sa volenté ausi comme li empereres Theodoses avoit fait jadis, ausi comme se il eust ce fait sanz raison et sanz jugement ; et s’en repenti et prist penitance de ce que il avoit fait à Bernart son neveu, qui par droit jugement avoit esté pugniz selonc son fait. Si s’amenda de quanque il se pot porpenser que il se fust mesfaiz en tiex choses, et metoit moult grant cure à apaisier Nostre Segneur pour tiex choses que il tenoit à pechié, et par aumosnes et par les oroisons de sainte Eglise, ausi comme se il eust ce fait par desloiauté et par cruauté, que il avoit fait par droit jugement.
En ce tens, envoia genz qui murent de Lombardie contre Leudevit le prince de Pannonie, et quant il sout ce, il ne les osa atendez, ainz guerpi sa terre[1] et s’enfui à garant à un prince de Dalmacie. Cil le reçut en sa cité ; mais cil l’en rendi mauvais guerredon, car il maismes l’occist puis en traïson et se mist en tel maniere en la possession et en la segneurie de la vile. Aus genz l’empereor ne fist ainques ne bataille ne parlement, mais il leur manda par messages que moult s’estoit meffaiz vers l’empereor et que volentiers venroit à li à merci.
En ce tens vindrent noveles à cort et fu conté à l’empereor que sa gent qui gardoient les marches par devers Espagne avoient passé le flum de Sichore[2] et estoient entré bien avant en la terre. Tout avoient ars
- ↑ Éginhard, Annales, année 822, est plus précis que l’Astronome. Il fait connaître la ville d’où Liudwit s’enfuit : « Siscia civitate relicta (auj. Sissek, Autriche-Hongrie, comitat d’Agram) ad Sorabos, quæ natio magnam Dalmatiæ partem obtinere dicitur, fugiendo se contulit. »
- ↑ Latin : « Sicorim fluvium », auj. la Segre.
