Puis que li rois ot ces noveles oïes, il assembla son ost sanz plus atendre et entra en Saisoigne. Toz les plus granz homes de la terre manda, et enquist par cui conseil cil domages li ot esté faiz et par cui il s’estoient contre lui torné. Il s’escrierent tuit que il avoient ce fait par Wintequin ; mais il ne li pooient livrer pour ce que il s’enfui aus Normanz tantost après le fait. Mais il li livrerent jusques à iiiim et d de ceus qui par li avoient esté principal en ceste felonie, et li rois les fist mener sor une iaue qui a non Alarem, en i lieu qui a non Ferdi[1] ; là lor fist à toz les chiés coper. Au tierz jor après que li rois ot pris venjance de ses anemis, il s’en ala pour yverner en une vile qui a non Theodone[2] ; là celebra la sollempnité de Noël et de Pasques.
[3]Thassiles, li dux de Baivire qui en l’an devant li avoit feueté jurée, mut armes contre lui par l’amonestement sa fame. Fille estoit Desier le roi de Pavie, que li rois avoit deserité et envoié en essil ; si cuidoit venchier par son mari le deseritement et la dampnation de son pere.
