devant et i mist contes et juges de la gent de France. Mais il n’ot pas bien les monz trespassez, quant novel message li vindrent au devant qui li nuncierent que li Saine avoient pris le chastel de Hereborc, et avoient occise et chacié la garnison de la gent de France qui dedenz estoit, et que Sigeborc, uns autres chastel, avoit esté asaliz ; mais il ne fu pas pris, car cil de la garnison issirent hors et se ferirent es Saines soudainement par darriers, tandis com il asaloient ; si n’estoient porveu ne ordené en bataille contre lor venue pour ce que il entendoient à l’assaut.[1]Si racontoient encore plus cil message et pour verité, quar la gloire et la vertuz Nostre Seigneur estoit là aperue tot apertement, car il sembloit aus Saines et à toz ceus qui là estoient que il veissent en l’air ii escuz de feu flambeanz et ardanz sor l’eglise du chastel, qui se demenoient par l’air li uns contre l’autre, ausi come se chevalier les demenoient en bataille. Pour ceste merveille et pour l’assaut que François lor livrerent au dos furent si espoanté que il tornerent tuit en fuite, et cil de la garnison les enchaucierent jusques au flueve de Lippie, et en occistrent moult en cele chace.
- ↑ La fin de ce paragraphe n’est pas dans les Annales d’Éginhard. On trouve ce fait dans les Annales Laurissenses, année 776, et dans la Chronique de Réginon (Monumenta Germaniæ historica, Scriptores, t. I, p. 156 et 558. Cf. Annales Mettenses, dans Recueil des historiens des Gaules et de la France, t. V, p. 342).
