CCCC XXVm, et cil qui eschaper porent s’enfuirent arriers en Espagne, sanz esperance de retor[1].
La seigneurie du palais, qui de son pere li estoit descendue, amenistroit noblement li princes Pepins. Cele honeurs soloit estre donée anciennement au plus nobles du roiaume et au plus puissanz de lignache. Cele segneurie tint Pepins de son aïol, de son pere et de son ainné frere Karlemanne, souz le roi Hildric, à la pais et à la concorde de tot le roiaume, car Kallemannes ses freres se rendi, après ce que il ot i poi regné, en une abbaïe que il fonda à Rome en un lieu qui a non Monsorat[2] ; en l’onor de saint Silvestre la fonda, por ce que il se tapi, et cela en cel liu ou tens de sa persecution. Cil Karlemannes guerpi puis ce lieu et se mist en l’abbaïe Saint Beneoit de Montecassin[3], pour ce que les genz et li noble home de France qui là aloient le visitoient trop sovent.
[4]A l’apostoile Estiene[5], qui lors estoit, demanda li princes Pepins, liquiex devoit estre rois ; cil qui de riens ne servoit, fors de sejorner, ne nule cure n’avoit des besoignes du roiaume, ou cil qui de tot avoit la cure et près et loinz, et par cui li roiaumes estoit du tot governez. Et li papes li remanda que cil devoit estre rois, qui de tot avoit le pooir et la cure, et en tel maniere li conferma l’oncion et la corone du roiaume ; si fu rois en tele maniere.
