Textes d’or, tables d’argent, croiz, encensiers et autres aornemenz ravirent. Dedenz l’eglise maismes herberjoient-il iaus et lor chevaus, et fesoient lor ordure delez le maistre autel de leanz. De ce se corrouça Nostres Sires et les en pugni en tel maniere que tuit cil qui ce fesoient estoient si esmeu dedenz les cors, que il metoient hors par desoz les boiaus et les entrailles. Li autre perdoient les ieuz et s’en aloient parmi l’eglise, une heure çà, autre là, com cil qui goute ne veoient. Li aumaçors maismes, qui mestres estoit d’iaus, perdi la veue du tout ; mais il la recovra toutes voies par le conseil d’un des prestres de l’eglise que il avoit pris. Cil li loua que il apelast l’aide Nostre Seigneur. Lors commença li Sarrazins à crier à haute voiz :
« O Dieux des crestiens, Diex de Jaques, Diex de Marie, Diex de Pierre, Diex de Martin et Diex de touz les crestiens, se tu me vieuz rendre mes ieuz et doner santé de ma veue, ausi come devant, je renoieré Mahomet mon Dieu et ne revendrai plus en la terre de Jaque, ton grant home, pour mal faire. O tu, Jaques, granz hons et granz sires, se tu me vieuz doner santé de mon ventre et de mes ieuz, je te rendrai quanque je ai pris en ta meson. »
xv jors après ce que il ot tot rendu à doble[1] et restabli quanque il avoit tolu[2] à l’eglise, il recovra santé des ieuz et dou ventre. De la contrée Saint Jaque se departi et promist que jamais en ces parties ne retorneroit pour rober ne por nul mal faire ; et bien recognoissoit et preechoit que li Diex des crestiens estoit puissanz et Jaques, ses deciples, granz hons.
