soi meesmes, si com il vot, devant touz tens, en la maniere que nus ne porroit dire ne penser. »
« Ce me plaist », dist li geanz, « que tu diz ; mais je ne voi pas coment cil qui estoit Diex fu faiz hons. »
« Cil », dist Rolant, « qui cria ciel et terre et toutes choses de noient, fist son Fil prendre humanité en la Virge sanz semence d’ome, par la vertu de son Saint Esperit. »
« De ce me merveil », dist Fernaguz, « et à ce entendre, vuel-je travaillier, coment il nasqui de Virge sanz semence d’ome, si com tu diz. »
« Je le te monstrerai », dist Rolant. « Diex, qui Adam forma sanz semence d’autre home, vout que ses Fiuz nasquist de Virge sanz semence d’autre home ; car ausi come il nasqui du Pere senz mere, ausi nasqui-il corporement de mere sans home pere ; car tiex naissance et tiex enfantemenz afiert à Dieu. »
« Moult me merveil », dist li geanz, « coment la Virge enfanta sanz home. »
« Je le te monstrerai », dist Rolant, « car cil qui fait ou pois et en la feve engendrer un ver, les voutoirs[1] et les serpenz, et mainz poissons sanz semence de masle ; cil meisme fist que la virginité engendra Dieu et home sanz nule corruption de soi et sanz semence d’ome. Cil qui fist le premier home sanz semence d’autrui, si come je t’ai monstré, legierement pot faire que ses Fiuz fust faiz hons ou cors de la Virge et que il nasquit hons sanz humain atouchement. »
« Bien puet estre », dist Fernaguz, « que il fust nez de Virge, si come tu diz. Mais, se il fu Fiuz Dieu,
- ↑ Voutoirs, latin « vultures », les vautours.
