Page:Viard - Grandes chroniques de France - Tome 3.djvu/273

Le texte de cette page a été corrigé et est conforme au fac-similé.

Dieu, message Nostre Seigneur Jhesu Crist, que nous parissons chascun jor ou non des xii apostres. » Lors respondi Aygolant. « Cil qui sont entor toi sont tien et sont bieneureus et largement menjuent et boivent et son bien vestu et noblement, et cil que tu diz qui sont de ton Dieu et si message, pourquoi sueffres-tu que il aient fain ne mesaise, et que il soient si viument[1] vestu et si loing de toi assis ne si laidement traité ? Mauvesement sert son seigneur qui ses messages reçoit si laidement. Grant honte fait à son seignor, qui ensi ses messages sert. Ta loy que tu disois si bone monstre par ce que ele soit fause. » Après ces paroles departi et retorna à sa gent, et refusa le saint baptesme que il voloit recevoir, et l’endemain manda à Karlemaine bataille. Lors entendi li empereres que il ot baptesme refusé pour les povres que il vit laidement traitier. Pour ce commanda Karlemaines que li povre fussent honestement vestu et que il fussent soufisamment repeu de vins et de viandes.

Ci endroit se puet chascuns advertir com cil est en grand corpe vers Nostre Seigneur qui ses povres ne peist en tens de neccessité. Se Karlemaines perdi ensi le roi Aygolant et sa gent que il ne fu baptiziez, pour ce que il vit les povres laidement traitier, que sera-il au jor du joise[2] de ceus qui en ceste mortel vie ont les povres en despit et malement les auront traitiez ? Coment porront-il oïr cele horrible sentence de Nostre Seignor, quant il dira : « Alez vous malooit[3] ou feu perdurable, car quant j’oi fain, vous ne me donastes

  1. Viument, vilement.
  2. Joise, jugement.
  3. Malooit, maudits.