Page:Viard - Grandes chroniques de France - Tome 3.djvu/259

armes ; c’est à dire, bones vertuz pour combatre contre les vices. Se nous avons donques foi contre l’eresie des Bogres^[1], charité contre envie, chastée contre luxure, oreson contre temptation, povreté contre les bones aventures des choses terrienes, perseverance contre legiereté de propos, silence contre tençons, obedience contre charnel corage ; noz hantes^[2] floriront devant Notre Seigneur au jor du jugement. O com sera ore beneureuse et florie en paradis, l’âme du vainqueor qui loiaument se sera combatuz contre les vices ; car nus ne sera coronez fors cil qui loiaument se seront combatu contre les pechiez. Et ausi come li chevalier Karlemaine morurent en bataille, aussi devons-nous morir quant aus vices et vivre ou monde en saintes vertuz, si que nous puissons deservir corone florie de victoire en la joie de paradis.

IV.

Des granz oz que Aigolant asembla contre Karlemaine, et puis coment il manda à Karlemaine que il venist à lui ; coment Karlemaines ala à lui en guise de message pour lui espier. Des batailles que il fist contre Aigolant ; coment Aigolant s’enfui ; coment Karlemaines retorna en France pour rasembler ses oz, et puis parole des nons des hauz homes que il mena ovec lui en cele voie.

^[3]En tant de tens come Karlemaines demora en France

1. Dans le latin on a seulement : « Contra haereticam pravitatem. »
2. Hantes, lances.
3. Turpini historia Karoli magni, chap. ix.