bataille ; du meschief où Karlemaines fu, et coment il retorna en France.
Li iiii parole des granz oz que Aigolant asembla contre Karlemaine et puis coment il manda à Karlemaine que il venist à lui ; coment Karlemaines ala à lui en guise de message pour lui espier. Des batailles que il fist contre Aigolant ; coment Aigolant s’enfui ; coment Karlemaines retorna en France pour rasembler ses oz, et puis parole des nons des hauz homes que il mena ovec lui en cele voie.
Li v parole coment Aigolant vint parler à Karlemaine en trives, de lor paroles et de lor desputoison ; coment il repristrent bataille autant contre autant, et coment li Sarrazins furent toz jors desconfit ; coment Aigolant vint à Karlemaine pour baptesme recevoir ; coment il s’en parti mau paiez pour les povres que il vit mengier en bas, et puis coment il prist jor de bataille à l’endemain.
Li vi parole coment tuit li Sarrazins furent desconfit et Aigolant occis, fors aucuns qui eschaperent ; coment François furent occis par lor covoitise quant il retornerent par nuit ou champs de la bataille ; coment li rois Forrez se combati à Karlemaine, et coment il et sa gent furent occis, et puis de ceus qui morurent sanz bataille.
Li vii parole coment Fernaguz, li jaiant, vint contre Karlemaine, d’outre la mer, de sa force et de sa grandor, et puis coment il enporta les barons Karlemaine en la cité de Nadres, l’un après l’autre ; coment Rolant se combati à li toute jor et puis coment il demanda trives à Rolant pour dormir, et coment Rolant li mist la pierre soz le chief pour ce que il ronfloit.
