La pais qui ot esté formée entre l’empereor et Amingue, le roi de Danemarche, fu tant seulement jurée ; si ne pot estre autrement confermée à cele foiz fors par sairement, car les parties ne pooient pas aiesiement assembler par la grieté[1] de l’yver et pour les chemins qui estoient perilleus à chevaucher. Mais quant la novele saisons fu revenue, x des nobles homes de chascune partie assemblerent par acort sor le flum d’Egidore ; là fu la pais confermée par sairement et par ostages, chascun selonc la maniere de lor païs. Li François qui de par l’empereor i furent envoié furent ensi nomé : li cuens Walac[2], fiuz Bernart, li cuens Vodons, li cuens Bulcarz, li cuens Unroques, li cuens Bernarz, li cuens Egberz, li cuens Tyerris, li cuens Albons, li cuens Ostdag, li cuens Guimans[3]. De la partie des Danois furent cist : Hancuins, Engadons, frere le roi Hamingue, et li autre furent des plus nobles de lor gent : Offrez, par sornon Turdimules, Warstan, Suomi, Hurim, Offriz, fiuz Heiligem, Offrez de Sconave, Aoves et Helbi.
Quant li empereres ot ensi pais confermée aus Danois, et il ot tenu general parlement selonc la costume, à Es la Chapele, il devisa ses oz en iii parties et les envoia en iii parties de son roiaume : l’une outre le