Page:Viard - Grandes chroniques de France - Tome 3.djvu/158

Le texte de cette page a été corrigé et est conforme au fac-similé.

et honoroient li roi d’Egypte et de Perse et d’autres regions de paenisme. Si desirroit plus lor amor et lor aliances, pour ce que li povre crestien qui mendioient en lor pooirs en eussent aucuns benefices et aucun alegement. Par tout son roiaume et son empire fesoit droite justice par ses menistres ; si compila et fist xxix chapitres de loys[1].

[2]Moult de choses furent contées à l’empereor de la vantance et de l’orgueil Godefroi le roi de Danemarche. Pour ce se pensa que il edifieroit une cité outre le flum d’Albe, et metroit garnison des François contre les envaïes et les assauz des estranges nations. Por ceste besoigne faire, furent quis et asemblé ovrier en France et en Alemagne, garni et apareillié d’armes, se mestier fust, et de tiex choses come à tel ovre faire covient, et fu commandé que il fussent mené par Frise au lieu droit où cele citez devoit estre comencié. Quant li lieus covenables à tel besoigne fu trovez, li empereres commanda la cure de l’ovre au conte Egbert, et que il trespassast le flum d’Albe et propreist et ordenast le siege de la cité. Cil lieus siet sor un flum qui est nomez Strurie[3] ; si est apelez en la langue du païs Essephet[4]. Li cuens Egberz et li conte du païs porprist et ordena le siege de la cité et le commencierent

  1. Ce sont les Capitulaires.
  2. Annales d’Éginhard, année 809.
  3. Strurie. La Stör, rivière du Schleswig-Holstein, affluent de l’Elbe.
  4. Essephet, auj. Itzehoe, ville du Schleswig-Holstein, sur la Stör.