de venir checun jour dire et deslivrer audict sieur de St-Vidal ou sieurs consulz de la présente vile le nombre d’hommes estrangiers qui seront lougez en leurs lougis, et balher le nom et surnom d’iceux et en oultre se saisir les armes que leurs hostes pourroyent avoir, de les advertir de se retirer de jour dans leurs lougis sans sourtir dehors ni discourir ès lesditz fauxbourgs après que la retraite sera donnée, à ce que par leur moyen auculn bruyt ou scandale ne puisse survenir.
De mesme est enjoinct à toutz lesdictz habitanz de se trouver les jours quilz seront de garde avec leurs armes a la fermeture de la porte de la présente vile pour après dez l’instant entrer en garde en la place du Martouret et sur la courtine de la muralhe de ladicte vile, et ce a peyne de deux escus d’amende contre chacun défalhant, et sur mesme peyne leur est inhibé de dessandre ni delaisser ou abandonner ladicte garde pour quelconque occasion que ce soyt jusques au lendemain heure de sept du matin que la porte sera ouverte et les autres gardes poustés.
En oultre est inhibé et deffandu ausditz habitanz silz ne sont de garde et a toutz estrangiers de quelque estat, qualité ou coudition quilz soyent, de passé l’heure de huict heures du soir que la cloche de la retraite aura cessé de sonner, aler et discourir par la vile avec armes sans appourter du feu, leur faisant très expresse inhibition et deffanse de pourter aulcunes armes a feu, long boys ou halebardes sous peyne de prison et punition exemplère.
Faict au Puy le vingt quatriesme may mil cinq cent quatre vingtz et cinq. Sainct Vidal (s. a.) — Par commandemant de mondit seigneur : Durrieu — Sceau en papier.
