quels cens et rentes lesdicles sœurs religieuzes payeront annuellemt et conformémt aux terriers desdicts seigneurs comtes et chappitre.
« Seront au surplus lesdictes religieuzes soubz la jurisdiction spirituelle dudict Chappitre, tout ainsi et de mesme que les religieuzes de Nostre-Dame de ceste dicte ville, et vivront selon l’institut de l’ordre de ladicte Vizitation, sans pouuoir néantmoins prendre aucun père spirituel directeur, chapelain ou confesseur, que par les ordres desdictz seigneurs comtes ; lesquels en tout et partout useront sans contredit des pouvoirs et facultés à eux acquises comme ordinaires, sans que lesdictes religieuzes ores et pour l’aduenir en puissent estre dispenséés pour quelque cause ou pretexte que ce soit.
« Ne pourront lesdictes sœurs religieuzes recevoir les enterremantz d’aucunes personnes de quelle qualité et condition qu’elles soyent, sans l’exprès consentement des ditz seigneurs du Chappitre. Et si la permission leur en est donnée, ce sera a la charge et condition que le curé ou son viccaire du lieu de leur encloz recevra le corps du décédé a l’entrée de sa paroisse, fera l’office et percevra tous les esmolumans.
« Et a l’esgard des enterremts desdictes sœurs religieuzes, l’office et les cérémonnyes seront faictes aussy par ledict curé ou viccaire de leur enclos, lequel, pour ce regard, ne pourra prétendre autre droit que celluy qui leur sera offert et baillé par ledict couvent volonteremt.
« Et en tant que touche l’article de la subsistance, nourriture et entretenemt desdictes sœurs religieuzes, au nombre de huict présentemt, et sy apprés jusques a ce qu’elles auront fondz et revenus suffizans, lesdictz seigneurs comtes, apprés auoir veu le susdict contract du treiziesme janvier mil six centz cinquante huict, passé entre elles et ledict seigneur marquis d’Allègre, concernant leur dicte fondation, et mis en considération la qualité dudict seigneur fondateur et la nottorité de sa puissance et richesses ; et que le dict fondz assigné par ledict contract est probablement suffisant pour l’entretient et nourriture desdictes
