plus icelles choses vendues garantir de leur faict et afaire et de leur dict ordre seulement. Ont aussy deslivré audict sieur acquereur les tiltres et papiers concernant ladicte terre et seigneurie designés et especifiés en l’inventaire particulier qu’en a esté faict et signé par moy dict notaire. Et ainsin que dessus est contenu lesdictes parties respectivement comme chescune d’elles concerne l’ont promis et juré attendre, garder et observer et n’y contrevenir par serrement presté scavoir par ledict sieur vendeur la main mise sur la poictrine à la forme des prebtres et par ledict sieur acquereur sur les saincts evangilles, et obligation ledict sieur acquereur de tous et chescun ces biens presans et advenir, les ungs respondans solidairement pour les autres et par exprès de ladicte terre et choses vendues par preferance et lesdicts sieurs vendeurs des biens temporels tant dudict couvent de Bonnefoy que aultres appartenans audict ordre des Chartreux qu’ils ont respectivement soumis aulx contraintes et rigueurs de ladicte cour de sénéchaussée et conventions du Puy et autres du presant royaume de France ; et chescune d’elles si ont renoncé et renoncent à tous droicts et exceptions par lesquels ils se pourraient ayder et servir contre la forme et teneur de ce contract et a celluy disant la generale renonciation ne valloir s’il ne s’ensuict ou precede l’especiale. De quoy à la requisition dudict sieur juge maige acquereur, et du vouloir et consentement des dicts sieurs de Bretanges et Maignet, vendeurs au nom susdict, a esté faict et retenu acte et instrument publiq par moy dit notaire. Faict et stipulé au Puy, maison dudict sieur juge maige, acquereur, en presance de Mr Me Anthoine Royet, recepveur des decimes et greffier des insinuations ecclesiastiques du diocèse du Puy et Me Anthoine Vincent, praticien dudict Puy, soubzsignés avec les parties et moy notaire royal soubzsigné recepvant.
Mareschal.
