Sans nulle honte ſe touillant,
Aloit dans le vin barbouillant
Comme une grenouille en la fange:
Puis iure chantoit la louenge
De ſon ami le bon Bacus,
Comme ſous lui furent vaincus
Les Thebains, & comme ſa mere
Trop chaudement receut ſon pere,
Qui, en lieu de faire cela
Las! toute viue la brula.
Il chantoit la grande maßüe,
Et la Iument de Gargantüe,
Son fils Panurge, & les pais
Des Papimanes ébais:
Et chantoit les Iles Hieres,
Et frere Ian des autonnieres,
Et d’Episteme les combas:
Mais la mort qui ne boiuoit pas
Tira le beuueur de ce monde,
Et ores le fait boire en l’onde
Qui fut trouble dans le giron
Du large fleuue d’Acheron.
Or toi quiconques fois qui paſſes
Sur ſa foſſe repen des taces,
Repen du bril, & des flacons,
Des ceruelas, & des iambons,
Car si encor deſſous la lame
Quelque ſentiment a ſon ame,
Il les aime mieus que des Lis
Țant ſoient ils fraichement cueillis.
Page:Ronsard - Le Bocage, 1554.djvu/33
Cette page n’a pas encore été corrigée
