Cette page n’a pas encore été corrigée
D’vn pecheur aus Naiades.
Si de ma tramblante gaule
Ie puis leuer hors de l’eau
Pris a l’ain, le gros barbeau
Qui hante au pié de ce ſaule.
Naiades des eaus profondes,
A vous ie promets en vœu,
De iamais n’estre plus veu
Repécher de ſur vos ondes:
Et pour enſeigne eternelle,
A ces ſaules verdelets,
Je vous pendrai mes filets
Mes lignes, & ma nacelle.
D’vne Courtizanne a Venus
Si ie puis ma jeuneſſe folle
Hantant les bordeaus, garentir
De ne pouvoir iamais ſentir
Ne poulains, chancre, ne verole.
O Venus, de Bacus compaigne,
A toi je promets en mes vœus
Mon éponge, & mes faus cheueus
Mon fard, mon miroer, & mon paigne.
