Page:Ronsard - Le Bocage, 1554.djvu/27

Sur les Constaus marche d’ordre une troupe,
L’vn les raiſins d’une ſerpette couppe,
L’autre les porte en ſa hote au preſſoüer,
L’un tout au tour du piuot fait roüer
La viz qui geint, l’autre le marc aſserre
En un monceau, & d’ais preßés le ſerre,
L’vn met a l’anche un panier ataché,
L’autre reçoit le pepin ecaché,
L’vn tient le mui, l’autre le vin entonne,
Vn bruit ſe fait, le preſſoüer en reſonne.
Vela LA PORTE, en quels plaiſirs ie ſuis
Or' que ta vile epouanté ie fuis,
Or' que l’Autonne épenche ſon vſure,
Et que la Liure a iuste pois meſure.
La nuit egale auec les iours egaus,
Et que les iours ne ſont ne frois ne chaus.
Quelque plaiſir toutesfois qui me tienne,
Faire ne puis qu'il ne me reſouuienne
De ton Paris, & que touſiours ecrit
Ce grand Paris ne ſoit en mon esprit.
Et te promets que ſi tôt que la Biſe
Hors de ſon Bois aura la fueille miſe,
Faiſant des prés la verte robe choir,
Que d’un pié pront ie courrai pour reuoir
Mes compagnons, & mes liures, que i’aime
Beaucoup plus qu’eus, que toi, ne que moimême.