Page:Ronsard - Œuvres complètes, Garnier, 1923, tome 2.djvu/54

Cette page n’a pas encore été corrigée

» Je le veux estre aussi : les hommes sont bien lours,
» Qui de nouvelle amour ne se laissent surprendre :
Le loyal qui ne veut qu’à une seule entendre,
N’est digne que Venus luy face de bons tours.
Celuy qui n’ose faire une amitié nouvelle,
A faute de courage, ou faute de cervelle,
Se défiant de soy, qui ne peut avoir mieux.
Les hommes maladifs, ou mattez de vieillesse
Doivent estre constans : mais sotte est la jeunesse,
Qui n’est point esveillée, et qui n’aime en cent lieux.


BELLEAU Marie, en me tanceant.) Il respond à sa dame, qui l’accusoit d’estre variable et inconstant en amours, et qui le renvoyoit à sa Cassandre, lors qu’il la prioit d’un baiser : puis comme par cholere il dit, que c’est le faict d’un homme couard et sans cœur, de se contenter d’une maistresse, et qu’il n’appartient qu’aux vieillards, ou à ceux qui sont affaiblis d’une longue et fascheuse maladie, d’estre fideles et constans. Il n’y a point de difficulté.


XIIII

Amour estant marry, qu’il avoit ses sagettes
Tiré contre Marie, et ne l’avoit blessée,
Par despit dans un bois sa trousse avoit laissée
Tant que pleine elle fust d’un bel essain d’Avettes.
Ja de leur piquerons, ces captives mouschettes
Pour avoir liberté, la trousse avoient persée,
Et s’enfuyoient alors qu’Amour l’a renversée
Sur la face à Marie, et sur ses mammelettes.