Tu me diras qu’honneste et gentille est t’amie,
Et je te respondrai qu’honneste fut Cynthie
L’amie de Properce en vers ingenieus,
Et si ne laissa pas de faire amour diverse :
Endure donq, Ami, car tu ne vaus pas mieus
Que Catulle valut, que Tibulle et Properce.
SONET A SA DAME
Où print Amour ceste grandeur de gloire,
Dont vostre face heureuse il honora ?
De quelle mine estoit l’or qui dora
Voz blonds cheveux, que l’or mesme on doibt croire ?
En quel jardin print il la rose, voire
Le liz duquel vostre teint colora,
Ou le coral, duquel il decora
Les blancs sommets de voz coutaux d’ivoire ?
Et de quel astre embla il la lumiere
De voz beaux yeux, qui vous font la premiere
En majesté, et en douceur d’audace ?
Amour vous aime, et le ciel vous honore,
Moi avec eux j’idolatre et adore
Le saint portrait de vostre belle face.
