Page:Ronsard - Œuvres complètes, Garnier, 1923, tome 2.djvu/321

Cette page n’a pas encore été corrigée

Tu me fis un Oracle : et m’esveillant apres
Je devins un Demon sçavant en toute chose.
J’appris que c’est Amour, du Ciel le fils aisné.
O bon Endymion, je ne suis estonné,
Si dormant sur la Lune en un sommeil extrême
La Lune te fist Dieu ! Tu es un froid amy.
Si j’avois pres ma Dame un quart d’heure dormy,
Je serois, non pas Dieu : je serois les Dieux mesme.


XXVI

Je liay d’un filet de soye cramoisie
Vostre bras l’autre jour, parlant avecques vous :
Mais le bras seulement fut captif de mes nouds,
Sans vous pouvoir lier ny cœur ny fantaisie.
Beauté, que pour maistresse unique j’ay choisie,
Le sort est inegal : vous triomphez de nous.
Vous me tenez esclave esprit, bras, et genous,
Et Amour ne vous tient ny prinse ny saisie.
Je veux parler, Maistresse, à quelque vieil sorcier,
A fin qu’il puisse au mien vostre vouloir lier,
Et qu’une mesme playe à noz cœurs soit semblable.
Je faux : l’amour qu’on charme, est de peu de sejour.
Estre beau, jeune, riche, eloquent, agreable,
Non les vers enchantez, sont les sorciers d’Amour.


XXVII

D’un profond pensement j’avois si fort troublée
L’imagination, qui toute en vous estoit,
Que mon ame à tous coups de mes lévres sortoit,
Pour estre, en me laissant, à la vostre assemblée.