N’aborde point au rivage d’Amour, Pour y vieillir sans espoir de retour. » L’Amour n’est rien qu’ardante frenaisie, » Qui de fumée emplist la fantasie » D’erreur, de vent et d’un songe importun : » Car le songer et l’Amour ce n’est qu’un.
BELLEAU
Fameux Ulysse.) Ceste Elegie est prise du douziesme
livre de l’Odyssée, où les Serenes pour persuader Ulysse
par leurs blandices et doux attraits de venir à leur bord,
chantent ceste chanson. Sur la fin l’Autheur admoneste
Amadis Jamin, Poëte excellent, de ne se laisser tellement
surprendre des trahisons d’Amour, qu’il consomme son
aage à courtizer un si malheureux Seigneur. Car comme
dit Arioste, celuy qui s’envieillit en Amour, est digne
de gehenne, et de la prison.
CHANSON
Douce Maistresse, touche
Pour soulager mon mal,
Mes lévres de ta bouche
Plus rouge que Coral :
D’un doux lien pressé
Tien mon col embrassé.
Puis face dessus face
Regarde moy les yeux,
Afin que ton trait passe
En mon cœur soucieux,
Lequel ne vit sinon
D’Amour et de ton nom.
