Comme incrédule, alors je ne pou vois En le mocquant, me contenir de rire. Je ne pensoy, tant novice j’estoy, Qu’homme eust senti ce que je ne sentoy, Et par mon fait les autres je jugeoye. Mais l’Archerot qui de moy se fâcha, Pour me punir, un tel soing me cacha Dedans le cœur, qu’onque puis je n’euz joye.
MURET
Depuis le jour.) L’argument est facile. L’an s’est en
soy retourné par sept fois.) C’est à dire, sept ans sont
passez. C’est une allusion au carme que j’ay desja allégué,
[Virgile, Georg. II, 402]
Atque in se sua per vestigia volvitur annus.
Du Florentin.) De Pétrarque.
CCXXII
Quand je te voy seule assise à par-toy,
Toute amusée avecques ta pensée,
Un peu la teste encontre bas baissée,
Te retirant du vulgaire et de moy :
Je veux souvent pour rompre ton esmoy,
Te saluer, mais ma voix offensée,
De trop de peur se retient amassée
Dedans la bouche, et me laisse tout coy.
Souffrir ne puis les rayons de ta veuë :
Craintive au corps, mon ame tremble esmeuë
Langue ne voix ne font leur action :
